سياسة الخصوصية

وش نجمع

• إذا سجّلت بحساب قوقل: نستلم من قوقل معرّف حسابك وإيميلك واسمك فقط، عشان نسوي لك حساب في صبّة. ما نستلم كلمة سرك ولا نوصل لأي شي ثاني في حسابك.
• إذا سجّلت بـ Apple (في تطبيق الآيفون): نستلم من Apple معرّف ثابت لحسابك، واسمك وإيميلك إذا اخترت تشاركها (تقدر تخفي إيميلك). ما نستلم كلمة سرك.
• الكاميرا والصور (في التطبيق): نستخدمها بس لما تضغط «صوّر كيسك» أو تختار صورة كيس، وما نوصل لأي صورة ثانية في جوالك.
• الإشعارات (في التطبيق): تنبيهات الصبّة تنجدول على جوالك نفسه وقت المؤقت، وما نرسل بياناتك لأحد عشانها.
• اللي تكتبه بنفسك: اسمك الظاهر، معرّفك (@)، النبذة، الصورة اللي تختارها، ووصفاتك.
• تفاعلك: من تتابع، ومن يتابعك، والحبّات اللي تعطيها وتجيك.
• صور أكياس البن: لما تصوّر كيس، الصورة تنرسل لخدمة ذكاء اصطناعي تقرأ بيانات الكيس. ما نحفظ الصورة إلا إذا وافقت على حفظها، وتنحفظ بدون اسمك.
• «قبل لا تشتري»: لما تصوّر كيس عشان تشوف آراء الناس، بيانات الكيس (المحمصة والاسم والأصل) تنرسل لخدمة ذكاء اصطناعي تدوّر عنها في الويب، وتنحفظ صفحة القهوة بدون اسمك عشان يستفيد منها غيرك. تقييمك ورأيك على القهوة يبان باسمك ومعرّفك، وتقدر تحذفه متى ما بغيت.
• مدرّب صبّة: لما تقول للمدرّب وش طعم كوبك، وصفك مع تفاصيل الوصفة والبن ينرسل لخدمة ذكاء اصطناعي عشان يقترح التعديل. ما ينرسل اسمك ولا إيميلك.
• الستريك وسجل أكوابك: أيامك وعدد أكوابك تنحفظ في حسابك عشان تنتقل معك بين أجهزتك، ومنها يتحسب لقبك.
• قائمة الستريك: ما تدخلها إلا إذا اخترت. لما تدخلها يبان للناس اسمك ومعرّفك وصورتك ولقبك وعدد أيامك، وتقدر تطلع منها متى ما بغيت.
• إعداداتك: طاحونتك وتعديلات ذوقك وتعديلات المدرّب تنحفظ في حسابك إذا كنت مسجّل، عشان تلقاها في أي جهاز.
• على جهازك: إعداداتك ووصفاتك وسجلّك تنحفظ في متصفحك.
• إحصائيات الزيارات: نحسب الزيارات بدون اسمك ولا إيميلك: رقم عشوائي في متصفحك، والصفحات اللي فتحتها، ومدة الزيارة، ونوع الجهاز، والمدينة التقريبية، ومن وين جيت (مثل انستقرام). ما نستخدم كوكيز ولا أدوات تتبّع خارجية. وإذا كنت مسجّل دخول، نربط زياراتك بحسابك (مدتها والصفحات والأشياء اللي سويتها في التطبيق مثل التصوير والتحضير) عشان نفهم كيف ينستخدم صبّة ونحسّنه. هالتفاصيل يشوفها صاحب صبّة بس، وأي أرقام نشاركها مع شركاء تكون مجمّعة بدون أسماء.

وش يشوف الناس

اسمك ومعرّفك ونبذتك وصورتك ولقبك، والوصفات اللي تختار تنشرها، وتقييماتك على القهوة، وعدد المتابعين والحبّات. وأيامك في الستريك تبان بس إذا دخلت القائمة. إيميلك ما يبان لأحد، ويشوفه صاحب صبّة فقط للتواصل أو عند البلاغات. الوصفات اللي ما تنشرها تبقى خاصة لك.

وش نسوي بالبيانات

نستخدمها عشان يشتغل التطبيق فقط: حسابك، وصفاتك، المتابعة، والحبّات، والستريك، وصفحات القهوة. ما نبيع بياناتك، وما نستخدمها للإعلانات، وما نتتبّعك بين التطبيقات أو المواقع.

وين تنحفظ

على خوادم Netlify. وقراءة صور الأكياس، والبحث عن آراء القهوة، واقتراحات المدرّب تتم عن طريق خدمة Claude من Anthropic.

البلاغات

تقدر تبلّغ عن أي حساب أو تقييم أو ملخص غلط. نراجع البلاغات خلال 24 ساعة، ونشيل المحتوى المخالف ونوقف صاحبه إذا لزم.

حذف حسابك

من «حسابي» ← زر الخيارات ← «احذف حسابي». ينحذف حسابك ووصفاتك المنشورة ومتابعاتك وحبّاتك وتقييماتك على القهوة وإعداداتك ومكانك في قائمة الستريك نهائياً.

تواصل

أي سؤال عن خصوصيتك: alismailibrahim92@gmail.com